თანამშრომლის ტიპი: ინტროვერტი VS ექსტრავერტი

  

თანამშრომლის ტემპერამენტი ერთ-ერთია იმ ფაქტორთაგან, რომელიც მენეჯერისგან ეფექტიან მართვას მოითხოვს. მაშინ როდესაც კომპანიის თანამშრომლები შეიძლება ბევრი სხვადასხვა მახასიათებლით განსხვავდებოდნენ ერთმანეთისგან, ყველა მათგანი შეიძლება მოვაქციოთ ამ ორიდან ერთ-ერთი ტიპის ტემპერამენტში: ინტროვერტი ან ექსტრავერტი.

ექსტრავერტი:

მისთვის ყოველი ახალი ადამიანი უბრალოდ უცნობი კი არ არის, პოტენციური კლიენტი ან მეგობარია;

ის ცდილობს არაფერს გამორჩეს, ენთუზიაზმით მონაწილეობს ყველა მოხალისეობრივ და ახალ საქმიანობაში, ჩართულია სამსახურის ყველა ახალ წამოწყებაში და ზოგჯერ ერთმანეთისგან სრულიად განსხვავებულ აქტივობებში;

ის ურთიერთობს ყველასთან, ვინც ამის სურვილს გამოხატავს, ხშირადა არის პირად საკითხებზე მსჯელობის ინიციატორი და ადვილად ხდება სამსახურის „სოციალური დირექტორი“.

ერთი შეხედვით კომუნიკაბელურ ექსტრავერტს „ბნელი მხარეებიც“ აქვს:

·         საქმიან ურთიერთობაში ლაღი ემოციური ექსპრესიის მოურიდებლობამ შესაძლოა უნდობლობა გამოიწვის კლიენტში, რომელიც მკაცრად „საქმეზე ორიენტირებულია“.

·         ის შეიძლება ადვილად „გადაიწვას“, როდესაც შთაბეჭდილების მოხდენას ან პატივისცემის მოპოვებას ცდილობს ერთგულებისა და ნებისყოფის ჭარბი დემონსტრირებით;

·         ის ხშირად სცდება საქმიანი ურთიერთობის ჩარჩოს და მეტისმეტად ფამილარული ხდება თანამშრომლებსა და კლიენტებთან, რაც მისდამი პატივისცემის განცდას უქმნის საფრთხეს.

ინტროვერტი:

ხშირად, მარტო მუშაობას ამჯობინებს და ღიზიანდება, როდესაც ხელს უშლიან;

მცდარი წარმოდგენაა, თითქოს მას ადამიანები არ აინტერესებს. უბრალოდ, მათთან ურთიერთობისგან თავს იკავებს. ის იშვიათად უერთდება სამსახურებრივ შეკრებას, თუ ის საქმესთან დაკავშირებული არაა;

იცდის სანამ სხვები არ განაცხადებენ უარს რაიმე საქმის გაძღოლაზე, ვიდრე თავად გამოხატავდეს ინიციატივას. კოლეგებს შესაძლოა გაუჩნდეთ განცდა, რომ წინააღმდეგობას ერიდება.

ერთი შეხედვით, ლიდერობისთვის ნაკლებად შესაფერის ინტროვერტს შთამბეჭდავი მხარეები აქვს:

·         კონცენტრაციისა და პრობლემის გადაწყვეტის შთამბეჭდავი უნარები. ინტროვერტი მენეჯერი წარადგენს სამოქმედო გეგმას, რომელიც კარგად გააზრებული და დეტალიზებულია;

·         მას შეუძლია კარგად გაართვას თავი დიპლომატის ან მომრიგებლის როლს, რადგან სხვების ქცევას ყურადღებით აკვირდება გვერდიდან/დისტანციიდან. ასეთ მენეჯერს შეუძლია ბალანსირებულად, ემოციური ჩართულობის გარეშე შეაჯეროს განსხვავებული პოზიციები;

·         მას შეუძლია გახდეს ეფექტური ლიდერი, იმიტომაც რომ წინსვლისკენ მოუთმენელ სწრაფვას არ აიძულებს საკუთარ თავს, ის კარგად აცნობიერებს თავის უნარებს და შეუძლია მოთმინებით დაელოდოს პროგრესს.

ცხადია, ექსტრავერტსაც და ინტროვერტსაც შეიძლება ჰქონდეთ ერთმანეთისთვის დამახასიათებელი ქცევები, შესაძლოა იპოვოთ ინტროვერტი, რომელმაც კარგად ისწავლა თუ როგორ დატოვოს ექსტრავერტის შთაბეჭდილება გარკვეულ სიტუაციაში და პირიქით. მაგრამ ის რაც ტემპერამენტის ამ ორ ტიპს ქმნის, მარტივია: ექსტრავერტი ურთიერთობებისკენ მიმართული არსებაა და ენერგიას ადამიანებისგან იღებს, ინტროვერტი კი იმუხტება საკუთარ თავთან გატარებული დროით და იღლება ადამიანებთან ურთიერთობისას.

პიროვნების ზემოაღნიშნული ტიპების განსხვავებული მოთხოვნილებების გააზრება საშუალებას გვაძლევს შევუქმნათ მათ ის გარემო, რომელიც სამსახურისადმი მათ დადებით დამოკიდებულებას და რესურსის გაღების სურვილს განაპირობებს. თუ ინტროვერტს არ შეუქმნით მშვიდ, უშუალო სივრცეს საკუთარი იდეების გაზიარებისთვის, ეს შესაძლოა არასოდეს გააკეთოს; თუ ექსტრავერტს იზოლირებულ კაბინაში მოუწყობთ სამუშაო სივრცეს, ის არასოდეს გამოავლენს თავის ენერგიულობას. მოაწყეთ სამუშაო გარემო ისე, რომ გათვალისწინებული იყოს ამ ტიპის ადამიანების მოთხოვნილებები.

 

	ინტროვერტი	ექსტრავერტი
სამუშაო სივრცე	მისთვის კომფორტულია მყუდრო, იზოლირებული სამუშაო ოთახი, სივრცე განმარტოებისთვის. იდეალურია თუ იქნება ოფისის ტელეფონისგან მოშორებით.	ურჩევნია ღია სივრცე ან დიდი ოთახი, სადაც ადამიანები ფიზიკური ბარიერების გარეშე ურთიერთობენ ერთმანეთთან, რათა მთელი დღის განმავლობაში ჰქონდეს ინტერაქციის საშუალება.
მენეჯერთან კომუნიკაცია	სჭირდება მშვიდი გარემო, რათა ბაზისური კომფორტი ჰქონდეს რომ სრულად ჩაერთოს საქმეში, ამიტომ ამჯობინებს ერთი-ერთზე ან ელექტრონულ კომუნიკაციას.	ურჩევნია გაფართოებული შეხვედრა, სადაც საკუთარი იდეებით ყურადღების ცენტრში მოექცევა და მრავალმხრივი უკუკავშირის მიღების შესაძლებლობა ექნება.
კოლეგებთან კომუნიკაცია	კომუნიკაცია აქვს ვიწრო ჯგუფთან, რომელსაც კარგად იცნობს და ენდობა, ვიდრე ზედაპირული საუბრები სხვადასხვა კოლეგასთან.	აქვს უამრავი ლაღი და ზედაპირული კონტაქტი კოლეგებთან, რომლებსაც შესაძლოა კარგად არც იცნობდეს.
ივენთები	სიამოვნებით გამოტოვებდა დაბადების დღის აღნიშვნასთან დაკავშირებულ ჯგუფური სიმღერის, მილოცვებისა და მქუხარე ტაშების ცენტრში ყოფნის შესაძლებლობას.	რაც მეტი თავყრილობა და ამაღელვებელი სიტუაცია იქნება, მით უფრო ენერგიული ხდება.
გადაწყვეტილების მიღება	ყურადღებით უსმენს და აანალიზებს. მხოლოდ საფუძვლიანი ფიქრის შემდეგ იღებს მნიშვნელოვან გადაწყვეტილებას.	ახალი ინფორმაციის მიღების (მოსმენის) პარალელურად მასზე მსჯელობა ეხმარება გააზრებაში. შესაძლოა არასრულად გადამუშავებულ ინფორმაციას დაეყრდნოს და  სწრაფად მიიღოს გადაწყვეტილება.
ცვლილება	ცვლილება უნდა მოხდეს ნელა ან სულ მცირე, წინასწარ უნდა იცოდეს, რომ შეძლოს ადაპტირება, მაგრამ როგორც კი შეეგუება, შეუძლია დაუღალავად კონცენტრირდეს თავის ამოცანაზე.	ცვლილება ბუნებრივი მოვლენაა მისთვის და ლაღად მიყვება დინებას, მაგრამ თუ ცვლილებამ მოლოდინი ერ გაუმართლა, მოტივაცია უქვეითდება.

არსებობს რეკომენდაციები თუ როგორ ვმართოთ თითოეული ტიპის თანამშრომელი:

ინტროვერტი, როგორც წესი, სამუშაო დღეს იწყებს აქტუალური საკითხების გადარჩევითა და დაგეგმვით, რისთვისაც მარტო ყოფნის 30 წუთი სჭირდება. შესაძლოა დღის განმავლობაშიც დასჭირდეს განტვირთვა. მიეცით მას „მარტო ყოფნის“ დრო დაგეგმვისთვის და წაახალისეთ რომ გამოიყენოს "do not disturb" ღილაკი, როდესაც დასჭირდება.

ექსტრავერტი ამჯობინებს დილა დაიწყოს ადამიანებთან კომუნიკაციით, ის მეტად პროდუქტიულია, როდესაც შეუძლია იდეების გაცვლა-გამოცვლა კოლეგების ფართო ჯგუფში. ხშირად ჩართეთ ის გონებრივი შტურმის აქტივობებში და მიეცით თავისუფლება იურთიერთოს სხვებთან, როდესაც ეს დასჭირდება;

ინტროვერტს დისკომფორტს ანიჭებს საკუთარ იდეებზე ხმამაღლა საუბარი თათბირზე. პირდაპირ მიმართეთ მას და ჰკითხეთ რა რეკომენდაციები აქვს. უმჯობესია, თუ ამას შეხვედრის წინ გააკეთებთ.

ექსტრავერტმა შესაძლოა მოუთმენლობა გამოიჩინოს და მოინდომოს მის იდეასთან დაკავშირებით ყველა დეტალის განხილვა მაშინათვე, გაფართოებულ შეხვედრაზე. აღნიშნეთ მისი იდეის მნიშვნელობა კოლეგების წინაშე, მაგრამ არ მისცეთ საშუალება, რომ მთელი შეხვედრა მას მიეძღვნას.

ინტროვერტ თანამშრომელზე მიმართული სტრატეგიები:

Ø  ადრეული გაფრთხილება: მოკლე, ინფორმაციული მეილით აცნობეთ მას დაგეგმილი და მოსალოდნელი შეხვედრების, პროექტებისა თუ ბიზნეს-საჭიროებების შესახებ, რათა მოასწროს ემოციური მომზადება და შესაძლო ცვლილებასთან ადაპტირება. ეს ითვალისწინებს მათთან რიგითი შეხვედრის შეთანხმებასაც რომ მოულოდნელობისგან დამატებითი დისკომფორტი არ შეუქმნათ;

Ø  მეტი პირადი კომუნიკაცია: ეს შეიძლება იყოს პირისპირ შეხვედრა ან ელექტრონული მიმოწერა, ნებისმიერი მეთოდი, რომელიც დიდ ჯგუფში შეკრებას არ მოითხოვს, რათა ამ ტიპის თანამშრომელმა საკმარისად კომფორტულად იგრძნოს თავი, რომ საკუთარ იდეებს ლაღად მოუყაროს თავი და დაძაბულობის გარეშე შეძლოს მათი წარდგენა;

Ø  ნუ დააჩქარებთ: ინტროვერტს სჭირდება დრო ინფორმაციის გადამუშავებისა და საკუთარი პოზიციის ჩამოყალიბებისთვის. ნუ მოელით მისგან მყისიერ პასუხს რაიმე პროექტთან ან ამოცანასთან დაკავშირებით, მიეცით დრო, რომ გაანალიზოს და მოგვიანებით წარმოგიდგინოთ პოზიცია, თუნდაც ძველმოდური, კარგად ფორმულირებული მეილის სახით.

ექსტრავერტ თანამშრომელზე მიმართული სტრატეგიები:

Ø  მიეცით საშუალება, რომ იბრწყინოს: ექსტრავერტის სოციალურობა შეიძლება გამაღიზიანებელიც კი გახდეს ზოგი კოლეგისთვის. იმის ნაცვლად, რომ შეზღუდოთ მისი ინტერაქციები, მიმართეთ მისი ენერგია ამოცანებზე, რომლებიც ადამიანებთან ურთიერთობის ნიჭს მოითხოვს;

Ø  იმსჯელეთ მასთან ერთად და ჰკითხეთ: ამ ადამიანებს საუბარსა და აზრების გაცვლა-გამოცვლაში მოსდით იდეები, მაგრამ ზეპირი მონახაზი შეიძლება ჯერ არ იყოს დასრულებული პროექტის იდეა, ამიტომ დაუსვით მათ კითხვები, ჩაერთეთ მსჯელობაში, რათა დაეხმაროთ საწყისი იდეის რეალურ ამოცანებად ჩამოყალიბებაში;

Ø  შეაჩერეთ, როდესაც ეს აუცილებელია: ექსტრავერტისთვის სცენის დათმობა და თავისუფალი ინტერაქციის საშუალების მიცემა ძალიან კარგია, მაგრამ დარწმუნდით, რომ საჭირო დროს შეგიძლიათ მისი განეიტრალება და სიტუაციის კონტროლი.